舊語改新詞
老氣橫秋的說話，被重新註解或曲解，竟然妙趣環生，成為使人噴飯的「至理名言」，撮些出來，博君一笑。
•明知山有虎，偏向虎山行（莫非嫌命長？應改為「不去明知山」才是上策）。
•小賭怡情，大賭變李嘉誠（富貴險中求，是賭徒堅信不移的信念，無人可動搖）。
•親友每年都寄生日咭來，祝你長命百歲；他們之中， 誰最真心想你萬壽無彊？（唔使問阿貴，一定系人壽保險的從業員）。
•西醫治標、中醫治本，中西合壁、治成標本（由此看來，只服TYLENOL或者只飲廿四味穩陣D，唔使嚇餐死）。
•歲月不饒人，起身見頭暈（上司明知你詐病，卻又吹你唔漲，是告病假的最佳借口）。
•又食又拎，扮曬親戚（做咗人情，食番夠本，唔使怕丑，當食放題）。
•窈窕淑女，供不應求（娶唔到老婆仲振振有詞敷衍父母的理由，寡佬必學）。
•大恩大德無以為報，唯有算數（施恩者應該諒解，因為施恩容易，報恩好難，唔系唔想報㗎，老友！）
•天沒降大任於我，點解照樣勞我筋骨？（言之有理，所以打份牛工，蛇得就蛇，缷得就缷，當系加咗人工，你會開心好多）。
•買六四九，輸到你嘔（雖然唔買窮實，買就輸實，但唔買總可以慳番幾蚊買串咖哩魚蛋實際D）。
•唔系猛龍唔過江，唔系豬扒唔化妝（在化妝品部門瀏覽，店員熱情接待，落力推銷，她們錯判我是濶少爺，還是我長相似足八兩金，需要化妝品補救？一念及此，十分無癮，此後行公司，切記不要誤入化妝部）。
作者張無忌：資深傳媒人、專欄作家，移民溫哥華多年。
